31 डिसेंबर पर्यंत HSRP बसवा अन्यथा होणार कारवाई?; हाय सिक्युरिटी रजिस्ट्रेशन प्लेट (HSRP) आता महाराष्ट्रातील सर्व वाहनधारकांसाठी अनिवार्य करण्यात आली आहे. तुमची दुचाकी असो, चारचाकी असो किंवा तीन चाकी, प्रत्येक वाहनाला ही नवी हाय सिक्युरिटी नंबर प्लेट बसवणे बंधनकारक आहे. यासाठी लवकरात लवकर ऑनलाईन बुकिंग करणे आवश्यक आहे, कारण याकरिता फार कमी दिवस शिल्लक आहेत. ही महत्त्वपूर्ण प्रक्रिया अगदी सोप्या पद्धतीने कशी पूर्ण करायची, याबद्दल सविस्तर माहिती खालीलप्रमाणे आहे.
सुरक्षित नंबर प्लेट मिळवण्यासाठी सर्वप्रथम तुम्हाला ‘ट्रान्सपोर्ट एचएसआरपी’ असे Google वर शोधून ‘ट्रान्सपोर्ट महाराष्ट्र’ च्या अधिकृत संकेतस्थळावर जावे लागेल. या पोर्टलवर आल्यानंतर, तुम्हाला तुमच्या वाहनाच्या रजिस्ट्रेशन नंबरनुसार (उदा. MH-XX) तुमचे आरटीओ कार्यालय (RTO Office) निवडावे लागेल आणि ‘सबमिट’ करावे लागेल. एकदा आरटीओ कार्यालय निवडल्यानंतर, तुम्हाला ‘ऑर्डर नाऊ’ (Order Now) या पर्यायावर क्लिक करून बुकिंग प्रक्रियेला सुरुवात करता येईल.
पुढील टप्प्यात, तुम्हाला नंबर प्लेट बसवण्याचे ठिकाण निवडायचे आहे. यामध्ये ‘डीलर प्रिमासेस’ (Dealer Premises) निवडून जुन्या वाहनांसाठी ‘कम्प्लीट एचएसआरपी किट’ (Complete HSRP Kit for Old Vehicle) हा पर्याय निवडायचा आहे. यानंतर तुमचा पिनकोड, पूर्ण गाडी नंबर, आणि चेसीज (Chassis) व इंजिन (Engine) नंबरचे शेवटचे पाच अंक प्रविष्ट करावे लागतील. तसेच, तुमचा मोबाईल नंबर टाकून ‘व्हेरिफाय विथ वाहन’ (Verify with Vahan) वर क्लिक करायचे आहे. त्यानंतर, तुम्हाला तुमच्या नजीकचे सेंटर किंवा शोरूम निवडून, नंबर प्लेट बसवण्यासाठी सोयीस्कर तारीख आणि वेळ (Appointment Slot) निवडायची आहे. साधारणपणे, ही तारीख अर्ज केल्याच्या १० ते १५ दिवसांनंतरची मिळू शकते.
शेवटच्या टप्प्यात, वाहनाचा प्रकार (मोटरसायकल किंवा स्कूटर) निश्चित करून मालकाचे नाव आणि बिलिंग ॲड्रेसची माहिती भरावी लागते. त्यानंतर मोबाईल नंबरवर आलेला ओटीपी (OTP) प्रविष्ट करून सर्व माहितीची पडताळणी करायची आहे. एकदा सर्व तपशील बरोबर असल्याची खात्री झाल्यावर, ठरवलेली शुल्क रक्कम (उदा. दुचाकीसाठी ₹५३१ आणि चारचाकीसाठी सुमारे ₹८७९) ऑनलाईन पद्धतीने भरावी लागते. पेमेंट यशस्वी झाल्यावर तुम्हाला एक पावती (Receipt) मिळेल. ही पावती सुरक्षित ठेवून, निवडलेल्या तारखेला तुमचे वाहन घेऊन संबंधित सेंटरवर गेल्यास तुमची हाय सिक्युरिटी नंबर प्लेट बसवून दिली जाईल.
